بنيادي طور اسپيني ٻوليءَ جي هن لفظ جو لُغوي مطلب ”ننڍي لڙائي“ آهي ، جيڪو ارڙهين صدي عيسويءَ کان اسپيني آزادي پسندن طرفان ’نيپوليئن بوناپارٽ‘ خلاف ڪيل محدود لڙائين کان استعمال ۾ آهي . ان قسم جي حڪمت عمليءَ جو ذڪر عظيم چيني جنگي عالم’سُن زو‘ (781-722 ق.م ) اڄ کان صديون اڳ به ڪيو آهي . لڙائيءَ جي ان غير روايتي قسم ذريعي ڪو ننڍو پر تربيت ورتل هٿياربند گروهه اوچتن ڇاپن، مُهم – جُوئي ، نشاني تي آيل شخصن/تنصيبات کي ختم ڪري ڀڄي وڃڻ ، تباه ڪارين ۽ دهشت ذريعي وڏن فوجي دستن ۽ حڪومتن خلاف ڊگهيون ڪارروايون ڪري کين ٿڪائي هارائڻ واري حڪمت عمليءَ تي ڪم ڪندو آهي . ان قسم جي لڙائيءَ ذريعي چيني گهرو ڇڪتاڻ (1949-1927ع) ۾ ’مائُوزي تونگ‘ جي قيادت ۾ ، فيديل ڪاسترو ۽ چي گويرا جي سربراهيءَ ۾ ڪيوبا (1959-1956ع) ۾ ، هوچي منه ۽ جنرل گياپ جي سرواڻيءَ ۾ ويٽنامي آزاديءَ جي جنگ (1975-1955ع) دوران پاڻ کان سگهاري طاقت خلاف وڏيون ڪاميابيون حاصل ڪيون. هن قسم جي لڙائيءَ ۾ عوامي حمايت ، علائقو ۽ ويڙهاڪن جو جذبو وڏي اهميت رکي ٿو